pensouthazerbaijan.info

ناصر مرقاتی

«بو قاراوَللی ده میللی اویونجاق قاروَللی­سی کیمی سککیز ایل اؤنجه یازیلیب.»

ــ  قاداسی قورد کيمی اولا! اووو...  عمييه بير قورد کيمی اولا! عمييه بارماقلارينلا قوردو گؤستر!! اده سنه دئميرم اولا !!!

ــ  يوخ، من "ماروژنی" ايستيرم .

ـ اده سنه دئييرم اولا، اولادا !

- او ... او ...

ياديمدا بابک قالاسينين يولون دومان باساندا او پاييز گئجه‌سی، من ادیالا بوروندوم واوزاقلاردا قوردلار باخ بئله ذيل اولاديلار و چوبان ايتلری آجيقلانديلار اوستلرينه. بيريسی گون:

- "گؤرورسنکی! بيزيم هرنه‌دن خبريميز وار! مثلا سن دونن بابک قالاسيندايدين. اوزاقدان سنه مواظيب‌ايديک. بير منه باخ! بيزيم سنين سو ايچمه‌ييندن‌ده خبريميز وار! بيزيم سننن هئچ شوخلوغوموز يوخدو!"

اوندايدی کی منيم ياديما، بالتا، بوز، بيز، قوردون ديشلری، سينيق شيشه گوموش رنگی و کيمسه اؤز شعرينده ايشله‌دن "جيغ بنفش" دوشدو .

اؤلکه دیشینا گلندن سورا، بير زامان، قولاغلاريما اينانميرديم؛ باخين گؤرون سيز بونا اينانيرسيز یا يوخ؟ ساغ اليزين‌ ایشاره بارماغينی يعنی ايکينجيسين و بيرده آخيرينجی بارماغينی (جولو بارماق) هاوادا ساخلايين، سورا اوچ قالان بارماقلاريزی بيری ـ بيرينه ياپيشديرين. بئله‌ليکله بير قورد سمبولو دوزلدين. آخيردا دا، بير قورد کيمی اولويا ـ اولويا بير مجليسه گيرين و بو ساياق آذربايجانی قورويون! البته قوروماغين، سؤيله ديييم ايلک آدديمين آتاندان سورا، ايکينجی آدديميندا، ياخشی‌دير کی هيتلرين (بير با ...لاجا دَيشيلميش) سؤزلريندن سيتاد گتيره‌سيز. مثلا مجليسيزين قاپيسيندا، يازا بيلرسيز کی، بو مجليسه روس‌لا ايتين و یا فارسلا ايتين گيرمه‌سی قاداغاندير. بو باره‌ده ياخشی بودور کی، بير شاعیردن یاردیم آلاسيز. شاعر بئله بير شعری سيزين اوچون يازا بيلر:

قورد اوغـلويام هر بير يئرده اولارام

فارس‌لا ايتی مجليسيمه  قويمارام

بونو بيربؤيوک پيلاکاردا يازين و قاپينين قاباغينا وورون. دوغورداندا بؤيوک بير مؤعجوزه اولاجاق، يعنی: بوتون روسلار و فارسلار درجا اؤلوب و آذربايجان قوروناجاق. باخ بولار آيت الکرسی دئييل، يوزده ـ يوز تاثيراتلی سؤزلردی. رحمتليک هيتلر بوندان بؤيوک بير نتيجه آلميشدير يعنی، اونون سويله‌دييی "يهودی ايله ايت بورا گيره بيلمز!" سؤزونون تاثيراتی آلتيندا آلتی ميليون يهودی درجا اؤلوب و نژاد آريايی آرينميش و قورونموشدو. رحمتليک هله بو باره‌ده تکجه آلمانا يوخ، نژادِ برتر آريايی‌يه ايرانا دا يارديم ائديردی. يعنی صاديق هـدايتين، "حاجی آقا" کتابيندا يازديغينا گؤره، نژادِ برتر ايرانييه طيياره ايله "چو ايران نباشد تن من مباد" اعلامييه‌سی تؤکوردو، رحمتلييين بؤيله بؤيوک تاثيراتی آلتيندا چوخو ايكيجه يوز ايل بوندان قاباق ياشايان "فردوسی طوسی" رحمتليکده، مين ايل بوندان قاباق، بالتانی ديبدن ووروب و يازدی کی: "هنر نزد ايرانيان است و بَس". و بئله ليکله (آدام يانديرما کوره‌‌لری) تيكيلدی.

-------------------------

ـ ماروژنی روس سؤزو : بستنی